兩分鐘睇完生物科技（五）
酵素 (又叫酶) 係指具有催化功能嘅蛋白質，而「催化」係加速化學反應嘅意思。我哋身體裏面就有數以百萬計、可細分為幾千種各有特定作用嘅酵素分子。如果冇佢哋，細胞內嘅化學反應好可能無法完成。
自古以嚟，人類喺整麵包、臭豆腐、釀酒等發酵食物嘅時候就唔覺意咁用咗酵素。除此之外，現代工業同喺日常生活都多得酵素幫手。有啲洗衣粉加咗「藍色粒子」，入面就係酵素：蛋白酶分解蛋白質、澱粉酶分解澱粉、纖維素酶分解蔬菜纖維，脂酶會分解脂肪。
黐喺衫度嗰啲污漬通常係食物菜汁、肉汁、芡汁，仲有皮膚嘅油脂、汗漬同血漬等，呢啲都好難就咁用水洗得甩。而酵素就大大提高咗洗衣粉嘅清潔效能，分解黐咗喺衣物纖維上嘅污漬 (蛋白質/澱粉/脂肪/纖維大分子)，剩番較細嘅分子就好容易咁俾水洗甩！
以前如果要大量生產呢啲酵素，通常都係喺動、植物細胞中提煉出嚟。例如喺20世紀初就有人諗到喺豬嘅胰臟榨萃蛋白酶，依家多得生物科技，喺實驗室利用人工篩選方法，甚至用上基因工程* 嚟改良酵素嘅性能。而家用到嘅蛋白酶好多都係由芽苞桿菌中提取，其中四、五成都嚟自基因改造細菌，例如枯草桿菌蛋白酶 (Subtilisin)。相對於動植物細胞，喺工廠大量培養微生物，技術上都比較快靚正，咁樣就可以降低提煉酵素嘅成本。
* 基因工程 (又叫遺傳工程／轉基因)，係用生物科技將細胞DNA重組，生產有用嘅蛋白質，主要用喺醫療同農業。