武肺疫苗你我他

Updated: May 14

三分鐘偷睇微生物世界


免疫係咩嚟?


如果身體俾一隻病菌入侵整病咗,無論係病得輕定重,好番後,我哋就唔會再感染同一種病菌俾佢整病多次,咁就即係「免疫」嘞。而接種疫苗之後,身體就唔使「病第一次先」都會得到免疫力。


18世紀,天花肆虐歐洲,死亡率好高。天花病毒同牛痘病毒好似樣。牛痘本來係牛嘅傳染病,雖然人類亦有機會傳染到,但徵狀就好輕微。


英國醫生愛德華 ‧ 詹納(Edward Jenner)留意到一啲揸牛奶女工惹咗牛痘,好番之後佢哋都唔會惹到天花。於是佢做咗啲接種牛痘嘅實驗,跟住發明咗牛痘疫苗,令接種咗嘅人可以產生對抗天花嘅抗體,即係對天花免疫咗啦。天花曾經喺世界各地奪去無數性命,尤其係兒童,多得牛痘疫苗嘅發明,1980年天花終於喺地球上消失。而家我哋稱詹納做免疫學之父。


一般疫苗嘅種類:


組分 - 微生物表面嘅組成部分,即係抗原

滅活 - 已經俾人死咗嘅微生物完整「軀殼」

減活 - 毒性減弱咗但係仲未死嘅微生物


疫苗嘅原理


全世界嘅科學家都夜以繼日咁研發緊對抗新型肺炎 (COVID-19) 嘅疫苗,以上講嘅傳統疫苗嘅原理係將抗原直接打入人體嚟刺激免疫系統去產生抗體。


新型啲嘅例如有「mRNA疫苗」同埋「病毒載體疫苗」,呢兩種疫苗嘅原理都係將病毒製造棘蛋白 (又叫做 "S蛋白") 嗰條mRNA打入人體。


mRNA 全名叫信使RNA (messenger RNA),負責將製造蛋白質嘅指令 (message) 送去細胞核糖體(細胞裏面嘅蛋白質生產工廠,英文:ribosomes),撳呢度睇蛋白質生產過程

mRNA疫苗將製造新冠病毒個S蛋白嘅mRNA送去人體細胞,跟住核糖體就係咁整啲S蛋白出嚟。身體個免疫系統開始攻擊同記住呢個病毒蛋白,增加人體對SARS-CoV-2嘅免疫力。之後如果真係有病毒入侵身體,我哋就可以即時產生抗體嚟保護自己而免受感染。


留意番,因為mRNA疫苗係冇可以製造SARS-CoV-2嘅核酸,條mRNA亦都唔會走入人體細胞核,所以打mRNA疫苗係唔會令人感染COVID-19。


病毒載體疫苗會用重組腺病毒 (adenovirus),通常做法係首先將病毒載體 (例如黑猩猩腺病毒載體) 嘅自我複製能力整走,再將一段製造新冠病毒S蛋白 (抗原) 嘅核酸插入腺病毒基因序列中,最後將佢送入人體細胞,細胞就會整啲抗原嚟刺激免疫系統。


另外,港大醫學院研發緊嘅新型肺炎「式疫苗」,就用減活流感病毒做載體,剔除咗毒性之後補上SARS-CoV-2嘅S蛋白基因。呢隻都係病毒載體疫苗,而佢嘅獨特之處係目前世界唯一研發中嘅鼻腔噴霧式COVID-19疫苗。佢會喺鼻腔同埋呼吸道刺激黏膜免疫反應,感覺上個防護直接啲。


社區群體免疫 預防勝於治療


當一個社區裏面大部分市民都打咗疫苗,就可以形成一個免疫力強嘅社區,疾病就擴散唔到。咁樣少數仲未打疫苗嘅人都變相受到保護啦。



睇埋:

  1. 點樣整RNA疫苗 [Compound Interest infographic]

  2. Periodic Graphics: How are RNA vaccines made? [c&en網站]

  3. 4 大 COVID-19 疫苗大解密 [Gene Online網站]

  4. 2019冠狀病毒病(COVID-19)疫苗技術簡介 [香大臨床試驗中心網站]



#免疫 #COVID-19 #打疫苗 #誇啦啦 #新型肺炎 #樂鋒報



294 views

Recent Posts

See All