海龜 Sea turtle
世界上有7種海龜，佢哋全部都係香港嘅常客。而最為人熟悉嘅就係瀕危物種綠海龜 [1]，佢哋經常喺南丫島深灣海灘出沒、曬太陽，同埋最重要嘅生蛋 [2]。幼綠海龜會食魚仔蝦仔蟹仔同魷魚仔，成年嘅綠海龜就會食得「清啲」，主要食海藻同海草。佢哋能夠吸一啖氣「潛水」長達五個鐘頭，跟住先至慢慢浮出水面呼吸幾秒鐘。
吸血鬼烏賊 Vampire squid
吸血鬼烏賊個款好得人驚，佢啲觸手有好似尖牙咁嘅尖刺，仲有睇起嚟似係深血紅色披肩嘅薄膜 [3]。但事實佢哋係一丁啲殺傷力都冇，通常匿喺深海靠食海洋雪為生。身體佈滿咗發光器，有危險時會射出一團發光黏液去轉移敵人視線，等自己有時間走得甩。跟據頭足動物嘅「族譜」aka 生物學分類，呢隻唔吸血嘅吸血鬼烏賊嚴格嚟講算係八爪魚 (octopus) 嘅疏堂親戚。
藍鯨 Blue Whale
藍鯨係世界上最大嘅哺乳類動物（唔係魚），佢比起第二大嘅哺乳類動物非洲象重30倍。一條藍鯨BB喺出世嗰時就重達2噸，單靠食好大量但係好細隻嘅磷蝦就可以每日增磅91公斤！ 鯨魚會唱歌去互相溝通，啲鯨歌聲係動物界中最響嘅聲音。有啲鯨歌嘅頻率好低，可以傳到千里之外都俾同類聽到。去呢處聽鯨歌：
[1] 成年綠海龜嘅殼呈黃綠色或深啡色，因為佢體內脂肪係淺綠色，所以叫做綠海龜。
[2] 漁護署短片 : 綠海龜與牠們的產地
[3] 吸血鬼烏賊短片 : Vampire Squid | Nautilus Live
原文登咗喺《良友之聲》6月號，呢篇係粵文加拎版。