海洋 W Y Z

Updated: Aug 5

鯨落 Whale fall

鯨落係指鯨魚死咗之後,下沉到一千米以下嘅深海。含有豐富營養嘅鯨魚屍體會孕育出一個複雜嘅生態系統。啲魚(例如太平洋睡鯊、盲鰻)會游去食鯨魚肉,如果條鯨魚屍好大可能要食好幾年至食得晒。跟住輪到啲無脊椎動物、蝦、蟹同埋蠕蟲會去食人哋食淨嘅嘢同埋屍體周圍嘅腐爛組織。然後又可能再過一、兩年,輪到好多細菌生喺鯨魚骨上面,吸引貝殼類生物過嚟食佢哋。就係咁菌食骨貝殼又食番菌又可以食幾十年。一條巨型嘅鯨魚屍體「海底自助餐」足以俾海底生物食一百年咁耐。

圖:Wiki Commons


《鯨落》 @科學狗 睇埋呢個: https://thekidshouldseethis.com/post/whale-fall


基瓦多毛怪 Yeti crab

gif

基瓦多毛怪住喺復活節島以南1500公里,3000米深嘅海底熱泉,佢個外殼好似陶瓷咁白雪雪,體長約15厘米,對大蟹鉗同腳都生滿用嚟「種細菌」嘅剛毛。因為佢外形似傳說中喜馬拉雅山毛茸茸嘅雪人,所以就有「雪人蟹」嘅綽號。海底熱泉外圍嘅水溫下跌得好快,而佢哋極之怕凍好易凍死,所以為咗盡量接近熱泉,就會好似疊羅漢咁樣堆埋一齊,喺座「蟹山」上面搵位置爭取溫暖嘅水流,完全無視社交距離!佢哋不停咁揈隻蟹鉗嚟「自己細菌自己種」,隨時收割啲菌嚟食。


浮游動物 Zooplankton

海洋裏面嘅微型生物種類繁多,一般分為兩類:浮游動物同埋浮游植物。浮游動物以細菌同浮游植物為食,倒翻轉亦都係其他生物嘅食物。浮游植物細胞好鬼微細,不過佢哋係地球嘅功用就絕對冇得睇小,因為佢哋進行光合作用生長,清除大氣中嘅二氧化碳、產生氧氣,係食物網嘅基礎。喺海洋生態系統裏面,微生物、植物同埋動物互相依賴。科學家會用「食物網」去顯示生物之間邊個靠邊個互相交錯嘅關係。

gif

最近十零年嘅研究發現,原來浮游植物同浮游動物之間仲有好多稱為「混營生物」嘅小怪物,佢哋可以進行光合作用之外,又可以好似動物咁獵食,集動、植物嘅雙重能力於一身……撳此睇文


原文登咗喺《良友之聲》7月號,呢篇係粵文加拎加長版。

43 views

Recent Posts

See All