海洋 O P P

O for Octopus 八爪魚

gif

八爪魚身體柔軟,能夠擠身非常狹窄嘅窿窿罅罅;佢有3個心臟、9個腦:包括一個中央大腦,另外嗰八隻爪各有一個相對原始嘅腦,唔怪之得佢識解決科學家俾佢嘅IQ題!深海小飛象章魚(右圖)天生有個卡哇依造型:眼大大、嘟起個皺皮嘴,兩邊嘅鰭又似象耳仔。八隻爪之間有薄膜,撐開所時形狀似把雨遮。


點分辨八爪魚、魷魚同墨魚?首先,佢哋嘅身體分咗頭、腳、軀幹三部分,因為佢哋啲腳生喺個頭上面,故稱為頭足動物。墨魚同魷魚有內殼支撐身體,八爪魚就又冇內殼又冇骨。八爪魚顧名思義有八隻生滿吸盤嘅爪。魷魚同墨魚有十隻爪 :包括八隻爪,加兩條可以伸縮捉獵物嘅特長觸手。


P for Penguin 企鵝

gif

企鵝住喺南半球嘅冰山上面,身上有又密又厚嘅防水羽毛,皮下脂肪有3厘米厚,可以頂得住冰天雪地中嘅生活。身體黑白嘅花紋係保護色,游水嗰陣,喺佢上面同下面嘅獵手就好難睇得見佢。佢擁有最流線型嘅身體,游水時速最高可達35公里。仲可以閉氣15分鐘,潛入200米深嘅水下面搵食。

P for Polar bear 北極熊

gif

北極熊住喺北極地帶,所以佢唔食企鵝。佢體型巨大,身重達680公斤。白雪雪嘅毛下面係黑色嘅皮膚,幫手吸收陽光保暖。佢啲嗅覺好勁,可以探測喺16公里外嘅獵物!佢會「守冰待豹」,企喺冰面等海豹浮上嚟呼吸嗰陣,就突襲捕獵佢哋。不過,慘慘豬嘅係全球氣溫上升,每年海冰融化早咗,又凍結得遲咗,令佢狩獵嘅時間少咗好多,成日要捱餓。仲要啲冰融晒,搞到佢哋要游好耐水至搵到地方唞吓,好容易餓死同浸死。



原文登咗喺《良友之聲》2022年4月號,呢篇係粵文加拎版。



70 views

Recent Posts

See All