兩分鐘睇完生物科技（七）
蘇格蘭出世嘅弗萊明 (Alexander Fleming，1881年8月6號—1955年3月11號) 喺倫敦聖瑪麗醫院實驗室做研究，想搵對抗細菌嘅物質。 第一個邂逅發生喺1922年 有日，惹咗傷風嘅弗萊明返實驗室 (我哋依家都知道病咗就要留喺屋企唔好返工返學，但係當時弗萊明似乎冇注意到公共衛生)，佢竟然研究自己啲鼻涕，將鼻涕滴喺生滿細菌嘅培養皿上面！發現鼻涕會溶解細菌，跟住仲測試咗眼淚同口水，發現呢啲體液中嘅溶菌酶 (lysozyme) 就係溶解細菌嘅物質。 第二個邂逅發生喺1928年 弗萊明同屋企人度假後返實驗室，佢見到有幾隻原先種滿葡萄球菌嘅培養皿俾一種綠色霉菌污染咗，奇怪嘅係，喺霉菌周圍並冇細菌生長，唔通係俾霉菌殺死咗？弗萊明決定繼續研究呢隻霉菌，發現咗有史以嚟第一個抗生素，仲用霉菌嘅拉丁名命名呢隻藥：盤尼西林 (英文：Penicillin，又叫青黴素)。呢隻藥後嚟救咗無數生命，特別喺第二次世界大戰期間，佢治療咗好多傷兵同埋好多嘅細菌感染。 下個挑戰係點樣大量生產盤尼西林 第二次世界大戰令抗菌藥物需求大增。發現咗盤尼西林之後，科學家都想搵更高盤尼西林產量嘅霉菌品種。起初係去街市搵唔同嘅發霉生果嚟逐個試驗同提純。後嚟利用人工方法改變遺傳物質：X光、紫外線以及化學物質嚟令霉菌突變，多次重複培養、突變同篩選嘅步驟，設法搵出「好生得」嘅菌種。
隻菌仲要適應到由實驗室轉去生化工廠啲生物反應器嘅環境改變，喺預設嘅條件生長同製造抗生素。而近年嘅熱門生物科技 - 分子進化工程技術，通過基因突變幫助設計高效能嘅酵素，加快開發半人工合成盤尼西林同更多類近嘅抗生素新藥。
近二、卅年興起嘅分子進化工程 (molecular evolution engineering) - 模擬生物進化歷程嘅定向進化 (directed evolution) 技術，以達到創造新基因、蛋白質、新物種嘅目的。呢啲技術包括易錯PCR，基因洗牌 (DNA shuffling)同增長截短技術 (ITCHY)等。P.S. 盤尼西林同其他抗生素淨係對細菌引起嘅感染同埋疾病有效， 對付唔到病毒。
參考資料：
Directed evolution opens door to new antibiotics (May 10, 2019) [Phys.org網站]
On a remarkable bacteriolytic element found in tissues and secretions (May 1, 1922) by Alexander Fleming https://doi.org/10.1098/rspb.1922.0023; [PDF]