生物科技係咩嚟？原來從古到今佢都梗喺我哋日常生活嘅左近。例子包括由遠自7000多年前已經有嘅做麵包同釀酒技術，到現代日新月異嘅醫療、製藥同檢測，仲有呢幾十年嚟都備受熱烈討論嘅基因改造農作物 (GMO)、複製羊多利，甚至係製造「超級人類」嘅瘋狂構思。
各種生物科技都會靠微生物，包括細菌、酵母同病毒等等嘅幫助。呢啲都係我哋肉眼睇唔見嘅微小生物，究竟有幾細？平時補衫用嘅縫紉針針頭咁細點嘅表面，就可以有成千上萬個細菌細胞！ [撳入去睇微生物同埋其他細胞有幾細]
1673年，顯微鏡嘅發明令人類開始從觀察去了解微生物。即係話，幾千年前人類釀酒同做麵包嘅過程中，原來不知不覺已經應用咗微生物幫助發酵。1833年，科學家發現第一個酵素（酶），漸漸明白微生物所生產嘅各種有用蛋白質，就係靠細胞裡面唔同類嘅酵素作用，現代生物科技正式發展。1953年Watson同阿Crick靠阿Franklin張相發現遺傳密碼「DNA」嘅雙螺旋結構（撳入去睇發生咗咩事），生物科技從此突飛猛進，從而改善人類社會糧食生產、健康同日常生活。
Comments