H for Hatchetfish 深海銀斧魚
因為佢望落似一把銀色嘅斧頭，呢條深海魚就被命名做半裸銀斧魚（Argyropelecus hemigymnus）。身體表面帶金屬閃閃下嘅質感，仲擁有纖瘦得離譜嘅身材，腹部同條部份透明嘅尾下面有一排發光器。喺一千米水深，發光器發出嘅光線會配合上方微弱嘅陽光，呢種巧妙嘅偽裝術能夠令自己隱藏喺昏暗嘅環境中，咁樣喺佢下方嘅獵手就好難發現佢嘞。
J for Jellyfish 水母
箱形水母Box jellyfish大約係一個籃球咁嘅大細，生咗24隻眼，平均分佈喺隻「箱」嘅四面。佢啲眼雖然多，不過就唔識得對焦！立方形狀箱下邊四隻角會伸出十幾條3米長含有劇毒嘅觸手。毒素會攻擊人體心臟同埋神經系統，足以令人3分鐘內死亡，係世界上最致命嘅毒水母之一。
L for Lobster 龍蝦
龍蝦喺海底用腳爬行嘅速度緩慢，但係要走起佬上嚟則可以好快：只要佢將個肚捲曲埋再申開，條尾就可以推動自己以每秒5米嘅速度向後彈。佢哋嘅視力雖然好差，但係嗅覺非常靈敏。即使離開咗水裏面，只要保持佢個鰓濕潤，就可以呼吸同存活一個禮拜。所以有時會見到啲檢獲走私龍蝦新聞圖片，佢哋係畀人放喺冷藏發泡膠箱裏面，唔使用水同魚缸咁運送。如果龍蝦冇被畀人捉咗去食，佢哋可以有100歲命長。
原文登咗喺《良友之聲》2022年2月號，呢篇係粵文加拎版。